Zozketaren oinarriak

1. Antolatzailea

Tolosaldeko Mankomunitateak antolatzen du zozketa hau, Ontzi Jokoa kanpainaren barruan.

• Izen soziala: Tolosaldeko Mankomunitatea
• IFZ: P7004501H
• Egoitza soziala: Bazurka Industrialdea 50, 20260 Alegia (Gipuzkoa)
• Telefonoa: 943 676 216
• Helbide elektronikoa: info@tolosaldekomankomunitatea.eus
• Webgunea: tolosaldekomankomunitatea.eus

Zozketak Arteman Komunikazioa Koop. E.k (IFK: F20813051; Basabe Poligonoa, 20550 Aretxabaleta, Gipuzkoa) egingo ditu, Mankomunitatearen izenean.

2. Kanpainaren iraupena

Kanpainak bost asteko iraupena izango du, 2026ko urriaren 20ko 00:00etatik azaroaren 20ko 12:00ak arte. Aste bakoitzean zozketa independente bat egingo da, aste horretan parte hartu duten pertsonen artean.

Parte hartzeko aldiak eta zozketen egunak (Espainiako ordu ofiziala):

• 1. astea: urriaren 20a, 00:00 – urriaren 23a, 12:00. Zozketa: urriaren 23a, ostirala, 12:00etan.
• 2. astea: urriaren 23a, 12:00 – urriaren 30a, 12:00. Zozketa: urriaren 30a, ostirala, 12:00etan.
• 3. astea: urriaren 30a, 12:00 – azaroaren 6a, 12:00. Zozketa: azaroaren 6a, ostirala, 12:00etan.
• 4. astea: azaroaren 6a, 12:00 – azaroaren 13a, 12:00. Zozketa: azaroaren 13a, ostirala, 12:00etan.
• 5. astea: azaroaren 13a, 12:00 – azaroaren 20a, 12:00. Zozketa: azaroaren 20a, ostirala, 12:00etan.

Parte-hartze bakoitza inprimakia bidaltzen den aldiko zozketan sartuko da, bidalketaren data eta orduaren arabera. Ostiraleko 12:00etatik aurrera bidalitako parte-hartzeak hurrengo asteko zozketan sartuko dira. Azaroaren 20ko 12:00etatik aurrera ezingo da parte hartu.

3. Parte-hartzaileak

Zozketan parte hartu ahal izango dute 18 urtetik gorako eta Tolosaldeko Mankomunitatea osatzen duten 28 udalerrietako batean bizi diren pertsonek: Abaltzisketa, Aduna, Albiztur, Alegia, Alkiza, Altzo, Amezketa, Andoain, Anoeta, Asteasu, Baliarrain, Belauntza, Berastegi, Berrobi, Elduain, Gaztelu, Hernialde, Ibarra, Ikaztegieta, Irura, Larraul, Leaburu-Txarama, Lizartza, Orendain, Orexa, Tolosa, Villabona eta Zizurkil.

Parte-hartzea doakoa izango da, eta ez da inolako erosketarik egin behar.

Adingabeen parte-hartzeak baliogabeak izango dira. Zozketan adingabe bat aukeratzen bada, saria ordezkoari emango zaio, 6. puntuan ezarritako hurrenkeran.

Ezin izango dute parte hartu kanpaina kudeatu duten Tolosaldeko Mankomunitateko langileek, ezta kanpaina kudeatu duen agentziako (Arteman Komunikazioa Koop. E.) langileek ere.

4. Parte hartzeko modua

Parte hartzeko, kanpainaren webgunean (ontzijokoa.eus) Ontzi Jokoa jokatu eta proposatutako 15 galderetatik gutxienez 12ri erantzun beharko zaie. Denbora amaitzean erantzun gabe geratzen diren galderak akats gisa zenbatuko dira. Jokoaren amaieran, “Parte hartu zozketan” botoia sakatu eta parte hartzeko inprimakia bete beharko da.

Inprimakian datu hauek eman beharko dira: izena, abizenak, helbide elektronikoa, telefono-zenbakia eta bizi den herria, eta 18 urte baino gehiago dituela adierazi beharko da. Era berean, oinarri hauek eta pribatutasun politika onartu beharko dira.

Lortutako emaitzak ez du eraginik izango zozketan irabazteko aukeretan. Hau da, lortutako emaitza edo puntuazioa edozein izanda ere, parte-hartzea baliozkotzat joko da.

Pertsona bakoitzak nahi adina aldiz parte hartu ahal izango du aste bakoitzean. Hala ere, pertsona berak aste berean egindako parte-hartze guztiak parte-hartze bakar gisa hartuko dira zozketa egiteko garaian. Helbide elektroniko edo telefono-zenbaki bera duten parte-hartzeak pertsona berarenak direla joko da.

5. Zozketa eta irabazleen aukeraketa

Aste bakoitza amaitzean, 2. puntuan adierazitako egunean eta orduan, zozketa egingo da aste horretan baldintzak betetzen dituzten parte-hartzaile guztien artean. Zozketa AppSorteos plataformaren (app-sorteos.com) bidez egingo da, eta plataformak sortzen duen ziurtagiri publikoak emaitza jasoko du.

Zozketa egiteko, aste horretako parte-hartzeak esportatu, bikoiztuak eta baldintzak betetzen ez dituztenak kendu, eta parte-hartzaile bakoitzari zenbaki bat esleituko zaio. Zozketa zenbakien zerrendarekin egingo da, eta ez zaio plataformari daturik bidaliko. Zozketa bakoitzaren zerrenda eta ziurtagiria gorde egingo dira, beharrezkoa bada egiaztatu ahal izateko.

Zozketa bakoitzean hiru pertsona aukeratuko dira:

• Irabazlea.
• Lehen ordezkoa.
• Bigarren ordezkoa.

Pertsona berak behin baino gehiagotan irabazi ahal izango du kanpainak irauten duen bost asteetan zehar.

6. Irabazleekin harremana eta saria erreklamatzeko epea

Zozketa egin eta berehala, Mankomunitatea irabazlearekin harremanetan jarriko da, lehenik helbide elektronikoz eta, ondoren, telefonoz, inprimakian emandako datuen bidez.

Irabazleak 10 egun naturaleko epea izango du saria onartzeko eta kudeatzeko, lehen mezu elektronikoa bidaltzen den unetik aurrera.

Epe hori igarotzen bada eta irabazlearekin harremanetan jartzerik ez badago, ez badu erantzuten, saria onartzen ez badu edo oinarri hauetako baldintzak betetzen ez baditu (adinez nagusia izatea eta 28 udalerrietako batean bizitzea, besteak beste), lehen ordezkoarekin jarriko da harremanetan, prozedura eta epe berberekin.

Lehen ordezkoarekin ere harremanetan jartzerik ez badago edo hark ez baditu ezarritako baldintzak betetzen, bigarren ordezkoari emango zaio aukera.

Hiru pertsonetako batek ere saria jasotzerik ez badu, saria eman gabe geratu ahal izango da.

7. Irabazlearen nortasunaren eta bizilekuaren egiaztapena

Irabazleak bere nortasuna egiaztatu beharko du saria jasotzeko. Horretarako, nortasun-agiri ofizial bat erakusteko eskatu ahal izango zaio, hala nola NANa. Era berean, Tolosaldeko Mankomunitatea osatzen duten 28 udalerrietako batean bizi dela egiaztatzeko eskatu ahal izango zaio.

Agiri horiek egiaztapenerako bakarrik erabiliko dira.

Saria irabazle suertatu den pertsonari bakarrik emango zaio.

8. Saria

Saria 60 euroko bonu bat izango da, Tolosaldeko Mankomunitatea osatzen duten 28 udalerrietako edozeinetan kokatutako jatetxe edo ostalaritza-establezimendu batean erabiltzeko.

Irabazleak berak aukeratu ahal izango du bonua erabiliko duen establezimendua. Saria behar bezala kudeatu ahal izateko, irabazleak aukeratutako establezimenduaren berri eman beharko dio Tolosaldeko Mankomunitateari nahikoa aurrerapenarekin, erakundeak establezimenduarekin harremanetan jartzeko eta beharrezko kudeaketak egiteko, erreserba barne, hala behar izanez gero.

Bonuak 3 hilabeteko balio-epea izango du, entregatzen den egunetik aurrera.

Kontsumoaren zenbatekoak 60 euro gainditzen baditu, irabazleak zuzenean ordaindu beharko dio establezimenduari 60 eurotik gorako zenbatekoa.

Bonua pertsonala eta besterenezina da. Ezin izango da dirutan trukatu, ezta beste sari batekin ordezkatu ere.

9. Irabazleen argitalpena

Aste bakoitzeko irabazlearen izena eta abizenaren lehen letra kanpainaren webgunean (ontzijokoa.eus) eta Tolosaldeko Mankomunitatearen Instagram kontuan (@tolosaldeko.mankomunitatea) argitaratuko dira, zozketaren ziurtagiriaren estekarekin batera. Ez da beste daturik argitaratuko.

10. Iruzurra eta arazo teknikoak

Tolosaldeko Mankomunitateak baliogabetu egingo ditu modu automatizatuan egindako parte-hartzeak, iruzurrezkoak direnak edo zozketaren funtzionamendu normala aldatzen saiatzen direnak.

Mankomunitateak ez du bere gain hartuko webgunearen edo jokoaren funtzionamenduan gerta daitezkeen etenen, akatsen edo arazo teknikoen erantzukizunik, ezta horien ondorioz parte hartu ezin izatearena ere.

11. Oinarriak aldatzea eta zozketa bertan behera uztea

Tolosaldeko Mankomunitateak oinarri hauek aldatu, zozketa eten edo bertan behera utzi ahal izango du, arrazoi justifikatuengatik edo ezinbesteko kasuetan. Edozein aldaketa kanpainaren webgunean argitaratuko da.

12. Parte-hartzea eta oinarriak onartzea

Zozketan parte hartzeak oinarri hauek osorik onartzea dakar.

Tolosaldeko Mankomunitateak oinarri hauetan ezarritako baldintzak betetzen ez dituzten edo datu okerrak edo faltsuak dituzten parte-hartzeak baztertzeko eskubidea izango du.

13. Datu pertsonalen babesa

• Arduraduna: Tolosaldeko Mankomunitatea. Bazurka Industrialdea 50, 20260 Alegia (Gipuzkoa). info@tolosaldekomankomunitatea.eus
• Datuak babesteko ordezkaria: osk@oscargalindo.com
• Helburua: kanpainako parte-hartzea kudeatzea, zozketak egitea, irabazleekin harremanetan jartzea, baldintzak egiaztatzea eta sariak kudeatzea.
• Legitimazioa: interesdunaren baimena (DBEOren 6.1.a art.).
• Hartzaileak: ez zaie daturik lagako hirugarrenei, lege-betebeharren bat dagoenean izan ezik. Arteman Komunikazioa Koop. E.k tratamendu-eragile gisa sar daiteke datuetara, zozketak egiteko. Ez da datuak hirugarren herrialdeetara transferitzea aurreikusten.
• Eskubideak: datuak eskuratzeko, zuzentzeko, ezabatzeko, eramateko eta tratamendua mugatzeko edo haren aurka egiteko eskubidea, eta baimena edozein unetan kentzekoa, info@tolosaldekomankomunitatea.eus helbidera idatzita. Datuak Babesteko Euskal Bulegoari (avpd.euskadi.eus) erreklamazioa aurkezteko eskubidea ere baduzu.
• Informazio gehiago: Pribatutasun politika.

14. Hizkuntzak

Oinarri hauek euskaraz eta gaztelaniaz argitaratzen dira, eta bi bertsioek balio bera dute.

15. Erreklamazioak eta lege aplikagarria

Zozketari buruzko kontsulta edo erreklamazioetarako, idatzi helbide honetara: info@tolosaldekomankomunitatea.eus.

Oinarri hauei Espainiako legeria aplikatuko zaie.